Parlamenterê BDP'ê yê Colemêrgê Adil Zozanî destnîşan kir ku Rêberê Gelê Kurd Abdullah Ocalan xeta wan a sor e. Zozanî di çarçoveya kampanya azadî ji bo Ocalan de îmze kom kir û got, "Azadiya bêyî Ocalan bila li me heram be."

Parlamenterê BDP'ê yê Colemêrgê Adil Zozanî, li bajarê Elmanya Essenê beşdarî Şahiya Kedê ya Federasyona Komeleyên Karkeran a Demokratîk (DÎDF) bû. Di şahiya bi beşdariya hezaran kesî de, Zozanî çû serdana dezgeha kampanya îmzeyan a ji bo azadiya Rêberê Gelê Kurd Abdullah Ocalan.

Li dezgeha Komeleya Kurd a Essenê, Zozanî der heqê rêveçûna kampanyayê de agahî stend. Zozanî piştre li dezgehê rûnişt û bi armanca piştgirîdayîna kampanya îmzeyan ji bo azadiya Rêberê Gelê Kurd Abdullah Ocalan îmze kom kir. Zozanî di axaftina xwe ya li vê derê de diyar kir ku Rêberê Gelê Kurd Abdullah Ocalan xeta wan a sor e û got, "Heta Ocalan azad bibe, têkoşîna me wê dewam bike. Bi awayekî vekirî û zelal dibêjin; Bila azadiyeke bê Ocalan li me heram be."

Zozanî di dawiya axaftina xwe de ji bo serketina kampanyayê bang li herkesî kir ku piştgiriyê bidê.