Li gorî belgeya ku ji aliyê Qesra Spî ve hat weşandin, plana Trump armanc dike ku Xezeyê veguherîne herêmeke "ji terorê hatiye paqijkirin, ne tundrew be” û Xeze ji nû ve were avakirin.

Li gorî planê heke herdu alî li hev bikin, hêzên Îsraîlê wê vekişin xeta diyarkirî û rehîne wê di nav 72 saetan de bên radestkirin.

Tê payin ku Xeze bi awayekî demkî ji aliyê komîteyeke Filistînî ya "teknokratîk" ve were birêvebirin û di bin serokatiya Trump de Serokwezîrê berê yê Îngiltereyê Tony Blair jî di nav de ji aliyê lijneyeke navneteweyî ve bê kontrolkirin.

Trump got, "Ez hîs dikim ku em ê bersivek erênî bigirin." Trump anî ziman ku heke Hamas red bike, wê Îsraîl “piştgiriya tam a DYE bigire.”

Serokê DYE’yê Donald Trump û Serokwezîrê Îsraîlê Binyamin Netanyahu piştî hevdîtinên li ser plana aştiyê ya Xezeyê, civîneke çapemeniyê li dar xistin. Trump got, "peymaneke aştiyê" nêzîk e. Civîna çapemeniyê ya hevpar didome.