Tevgera Asûrî ya Demokratîk navenda xwe ya yekemîn li bajarê Dêrîkê vekir. Piştî vekirinê nûnerên gelek partî û tevgerên siyasî çûn serdana navendê.

Tevgera Asûrî ya Demokratîk ku ji bo mafên welatiyên Asûrî yên Rojavayê Kurdistanê û Suriyê têkoşînê dide, navenda xwe ya yekemîn li bajarê Dêrikê vekir. Piştî vekirinê nûnerên Tevgera Civaka Demokratîk, partiyên siyasî yên girêdayî Encumenî Niştimanî Kurd li Sûriyeyê (ENKS) û gelek rêxistinên din çûn serdana navendê û pîroz kirin.

Endamê Tevgera Asûrî ya Demokratîk Mesût Ebdulehed, diyar kir ku cara yekemîn e li nav û amblema wan li ser avahiyekê tê daliqandin û got ku ev navend wê xebatên siyasî bimeşîne, bi pêkhateyên din ên Suriyê re dîplomasiyê bide meşandin û her wiha xebatên çandî û civakî bimeşîne. Ebdulehed, anî ziman ku tevgera wan dê ji hemû pêkhateyên Dêrikê komîteyekê ava bike û dê ev komîte ji bo jiyana hevbeş û wekhev kar bike.

Ebdulehed, piştgirî da pêvajoya ku Rêberê Gelê Kurd Abdullah Ocalan daye destpêkirin û azadiya Ocalan xwest.