Bi armanca şermezarkirina embargoya komên çekdar yên Artêşa Azad li ser herêma Efrînê û piştgiriya Desteya Bilind a Kurd, bi beşdariya Meclîsa Gelê Rojava û Encûmana Niştimanî a Kurdî li Sûriyê, gelê Serêkaniyê xwepêşandaneke girseyî lidar xist.

Xwepêşandana ku gelek nûnerên partiyên siyasî jî beşdar bûn li pêşiya Mala Gel a Serêkaniyê bi deqeyek rêzgirtinê dest pêkir, piştre girseya gel ber bi Meydana Azadî ve meşiyan. Di xwepêşandanê de siloganên piştgirya Desteya Bilind a Kurd hatin avêtin û berxwedana Yekîneyên Parastina Gel (YPG), li Efrînê û li tevayî Rojavayê Kurdistanê hate silav kirin. Her wiha di meşê de alên Kurdî, posterên Rêberê Gelê Kurd Abdulah Ocalan û pankartên piştgiriya bi gelê Efrînê re hatin hildan.

Li Meydana Azadî , endamê Meclîsa herêmê ya ENKS, Mihemed Salih Etiya ji girseya gel re axivî, Etiya bal kişand ser girîngiya çalakkirina Desteya Bilind a Kurd û berxwedam (YPG) li Efrînê jî silav kir.

Bi navê Mevlîsa Gelê Rojava, Xelîl Osman axivî û diyar kir ku ji bo geşedayînên li Efrînê berpirsyariyeke dîrokî dikeve ser mil Desteya Bilind a Kurd.

Osman diyar kir ku ew wek  MGR girêdayî biryarên hevpeymana Hewlêrê ne,  lê hin aliyên di nav (ENKS), xebatên Desteya Bilind a Kurd asteng dikin.

Xwepêşandan bi siloganên piştgirya Desteya Bilind a Kurd û berxwedana Yekîneyên Parastina Gel (YPG), li Efrînê û li tevayî Rojavayê Kurdistanê bi dawî bû.

Hêzên Asayişa giştî û ya jinan jî ji bo ewlekariyê li qada xwepêşandanê amade bûn.