Li bajarê Fransa Strasbourgê, nobeda ji bo azadiya Rêberê Gelê Kurd Abdullah Ocalan û hemû girtiyên siyasî tê girtin, di hefteya 54. de ye. Bi çalakiya nobedê re her roj bi sedan kes der heqê prisgirêka Kurd û rewşa Ocalan de tên agahdarkirin.

Çalakiya nobedê ya ji bo azadiya Ocalan û girtiyên siyasî yên Kurd di 25'ê Hezîrana sala 2012'an de li ber Konseya Ewropayê destpê kir, roja 370. li dû xwe hişt. Endamên Partiya Jiyana Azad a Kurdistanê (PJAK) duh çalakî dewir 4 welatiyên Kurd ên ji bajarê Elmanya Dusseldorfê hatin kirin.

Endamên koma nû, duh di roja destpêkê ya çalakiyê de bi sedan belavok belav kirin û îmze berhev kirin. bi taybetî tûrîst û ciwanên li bajêr digerin, pêwendiyeke mezin nîşanÎ çalakiyê didin. Di çarçoveya kampanya ji Ocalan re Azadî de bi zimanên Îngilîzî, Elmanî û Fransî belavok tên belavkirin. Çalakgerên nobedê broşurên bi sernavê "Ocalan kiye?" belav dikin.

Ji çalakgeran Haydar Arslan ya ji koma Dusseldorfê agahî da ANF'ê û diyar kir ku nobeda ji bo azadiya Ocalan çalakiyeke watedar e, û got, "Armanca me destpêkê sererastkirina mercên jiyanê yên Rêber Apo ye, dûre jî ji bo selametiya pêvajoyê, serbestberdana wî ye."

Endamên koma Dusseldorfê her weha ji bo ravekirina pirsgirêka Kurdan û rewşa Ocalan ji biyaniyan xwestin, Kurdên bi Îngilîzî û Fransî dizanin, alîkariyê bidin çalakiya wan. Çalakgeran bal kişandin ser girîngiya piştgiriya Kurdistaniyên li Strasbourg û derdora wê.

OCALAN Û PIRSGIRÊKA KURD JI DEHHEZARAN RE HAT VEGOTIN

Çalakiya Nobedê ya ji Ocalan û girtiyên siyasî yên Kurd re azadî ji 25'ê Hezîrana sala 2012'an û vir ve li ber Konseya Ewropayê ji aliyê komên ji 4 heta 7 kesan tê meşandin. bi wesîleya yekemîn salvegera çalakiyê, roja Sêşemê mîtîngek hatibû lidarxistin û encamên hatibûn wergirtin, bi girseya gel re hatibû parvekirin.

Çalakî bi beşdariya gel û nûnerên saziyan ên ji çar aliyên Ewropayê tê û heta niha nêzî 8 hezar îmze hatine berhevkirin. Di çalakiyê de bi dehhezaran broşur hatin belavkirin û her roj ji sedan kesan re pirsgirêka Kurd û rewşa Ocalan tê vegotin.