Di çarçoveya kampanya îmzeyê ya TUHAD-DER'a Wanê de, ji bo azadiya Rêberê Gelê Kurd Abdullah Ocalan û girtiyên siyasî heta niha zêdeyî 200 hezar îmze hatin berhevkirin. 

Ji bo azadiya Rêberê Gelê Kurd Abdullah Ocalan û girtiyên siyasî, TUHAD-DER'a Wanê, ji 19'ê Hezîranê û vir ve îmzeyan berhev dike. Hat ragihandin, di çarçoveya kampanya ku wê heta 15'ê Tîrmehê dewam bike de heta niha zêdeyî 200 hezar îmze hatine berhevkirin. Serokê TUHAD-DER'a Wanê Ahmet Aygun ji DÎHA'yê re ragihand ku ji bo berhevkirina îmzeyan wan li gelek cihên navenda bajêr standên îmzeyê vekirin û da zanîn ku li bendê ne heta 15 tîrmehê ew hejmara îmzeyan derxînin 300 hezarî."

Aygun, diyar kir ku îmzeyên hatine berhevkirin dê ji Serokkomar, Serokwezîr û Wezareta Dadê re bişînin. Her wiha Aygun, destnîşan kir ku wan di encama nîqaşan de biryar deye ku kampanyayê li tevahiya Tirkiye û heremê belav bikin û ji bo vê jî dest bi amedekariyan kiriye.