Ciwanên Kurd ên li bajarê Elmanya Mannheimê dijîn, di 9'ê Hezîranê de li Komeleya Çanda Kurd a Ludwigshafenê kongreya xwe lidar xistin û Meclîsa Ciwanan a Şehîd Rohanî Amed damezrandin. Kongre yadî sê şoreşgerên jin ên li Parîsê hatin kuştin Sakîne Cansiz, Fîdan Dogan û Leyla Şaylemez hat kirin û bi hilbijartina dîwanê, deqeyeke rêzgirtinê û destnîşankirina rojevê, destpê kir.

Di kongreya bi beşdariya 60 delegeyan de, rapora xebatê ya salekê, peyamên Komalên Ciwan û komîsyona jinên ciwan li Ewrûpayê hatin xwendin. Nivîskara rojnameya Yenî Ozgur Polîtîkayê Meral Çîçek di axaftina xwe ya li vê derê de, ji bo çareserkirina pirsgirêkên ciwanên Kurd û têkoşîna li dijî qirkirina çandê û pûçbûna Modernîteya Kapîtalîst, bal kişand ser girîngiya rêxistinbûyîna meclîsê. 

Di kongreyê de, komîsyonên rêxistinbûyîn, çand, têkiliyên bi derve-çapemenî, jinên ciwan û xwendekaran ên Meclîsa Ciwanan a Şehîd Ronahî Amed hatin damezarandin û endam û hevberdevkên meclîsê hatin hilbijartin. Di kongreyê de, ji ciwanên li Mannheimê re ji ber xebatên wan ên serketî xelat hat dayîn û hat destnîşankirin, ku ciwan wê bi awayekî çalak cihê xwe di pêvajoya çareseriyê de bigirin.