Hêzên rejîma Sûriyeyê êrîşên xwe yên li dijî gundê Ziyaretê yê girêdayî navçeya Şêrawa ya Efrînê didomîne. Di êrîşa îro ku hîn didome de welatiyekê jiyana xwe ji dest da û gelek kes jî birîndar bûn.

Hêzên rejîma Sûriyeyê û alîgirên wê, îro dîsa ji bajarokên Nibil û Zehra bi topan êrîşî gundê Ziyaret ê girêdayî Şêrawa kirin. Her wiha balefirên şer jî gund bombebaran kirin. Di encama êrîşên ku saet di 11.00’an de destpêkirin de, welatiyekê jiyana xwe ji dest da û gelek kes jî birîndar bûn.

Welatiyên birîndar rakirin nexweşxenayên gerok ên ji bo rewşên lezgîn hatine avakirin û nexweşxaneya Avrîn a Efrînê. Hate ragihandin ku topbarana li hemberî gund didome.

Li aliyê din çavkaniyên herêmê ragihadin ku, balefirên şer bajaroka Dêr Cemal a girêdayî Ezazê jî bombebaran kiriye.

Hêzên rejîmê 2 roj beriya niha jî, ji bajarokên Nibil û Zehra gundên Ziyaret û Gundê Mezin topbaran kiribûn û di encamê de zarokekî 9 salî jiyana xwe ji dest dabû, 9 kes jî birîndar bibûn.