Li Herêma Federal a Kurdistan di meha Hezîranê de herî kêm 9 jin hatine qetilkirin. Li gorî Sekretera Yekîtiya Jinan a Kurdistan Viyan Silêman di meha havînê de qetilkirina jinan zêde dibe.

Li gorî rojnameya Rudaw di nav meha Hezîranê de li Hewlêr 3, li Dihokê 2, li Çemçemal 2 û li Xurmatu jî 2 jin hatine qetilkirin. Her wiha hat ragihandin ku jineke ji Başûrê Kurdistanê jî li Norveçê ji aliyê zilamekî ve hatiye qetilkirin.

Bi bîlançoya meha Hezîranê re di 6 mehên destpêkê yên 2013’an de hejmara jinên hatine qetilkirin gihiştine 32’an. Di tevahiya sala 2010’an de 49, di sala 2011’an de 43 û sala 2012’an de jî 46 jin hatibûn qetikirin.

Sekretera Yekîtiya Jinên Kurdistan Viyan Silêman got: “Di demsala havînê de qetilkirina jinan zêde dibe. Bi taybet jî li Germiyan û dîsa li Şengalê xwekuştinên jinan zêde ne. Lewma xebat û çalakiyên komeleya me di mehên havînê de zêde dibin.”