Li paytexta Awûstûrya Viyanayê, Yekîtiya Hêzê ya Demokratîk bi dirûşma "Dest nede vîna gel, dest nede wekîlên min" mîtîngek lidar xist.

Çalakger li ber avahiya Wezareta Karên Hundir a Awûstûryayê li hev civiyan û ji bo bîranîna şehîdên şoreşê yên Kurdistan û Cîhanê deqeyek rêz girtin.

Li ser navê Yekîtiya Hêzê ya Demokratîk daxuyaniyek li vir hat dayîn û hat ragihandin, faşîzma AKP'ê qirkirina siyasî li ser gelan, baweriya Elewiyan û kedkaran ferz dike.

Di dewama daxuyaniyê de hat gotin, "Qirkirina ku vê sîstema tekparêz û qetlîamker li Dersîm, Mşere û Sêwasê bi rengekî hovane li dijî Elewiyan kir, îro li Sûr, Silopiya, Cizîr û Colemêrgê li dijî gelê Kurd dike. Bi avêtina HDP'ê ji Meclîsê û bicihkirina DAIŞ'ê li herêmên Elewiyan ve provaya şerê navxweyî li Tirkiyeyê dike."

Di çalakiyê de belavokên bi zimanê Elmanî hatin belavkirin, gelek saziyan daxuyanî dan û dirûşmên "Kujer Erdogan", "Kujer TC", "Bijî HDP", "Bijî têkoşîna şoreşgerî ya gelan" hatin qîrîn.