Hate diyarkirin ku komên çekdar ên girêdayî Artêşa Azad bi darê zorê welatiyan li dijî gelê Kurd û hêza gel YPG’ê didin meşandin.

Welatiyên ku ji Helebê dihatin Efrînê, diyar kirin ku duh di seatên êvarê de komên çekdar ên girêdayî tabûra Lîwa El-Tewhîd û Asîfet El-Şemal bi darê zorê ew ji maşîneyan daxistine û ligel şêniyên ji Ezazê, li dijî gelê Kurd û YPG’ê dane meşandin. Welatiyên ku bûyer bi çavên xwe dîtin diyar kirin ku, komên çekdar dîmenên meşê dikişandin da ku li ser hin televizyonan biweşînin û bêjin ku gel li dijî Kurdan dimeşin.

Welatiyên ji Ezazê dan zanîn ku armanca komên çekdar ew e ku gelê herêmê şerê hev bikin û li dijî hev derkevin. Welatiyan destnîşan kirin ku pirraniya gelê Ezazê daxwaza komên çekdar ên meşê red kirine û yên din jî kesên bi darê zorê derketibûn.

Komên çekdar ên Artêşa Azad ev demeke herêma Efrîn dorpêç kirine, welatiyan direvînin, êşkenceyê li wan dikin û bacê ji wan werdigirin.