Komeleya Keyayên navçeyên Bêdlis Tetwan û Xîzanê serî li Serokatiya BDP'ê ya bajarê Bêdlisê dan û ji bo dîtina sê karkerên ev hefteyeke jê hay tinene, alîkarî xwest.

Serokên Komeleya Keyayên Navenda Bêdlis, Tetwan û Xîzanê û 30 keya li Serokatiya BDP'ê ya Bêdlisê li hev kom bûn.

Keyayan dan xuyakirin ku piştî şerê salên dirêj, pêşketina pêvajoya aştiyê ya navbera herdu aliyan rê li ber hêviyan vekiriye û fikarên xwe yên ji ber hin bûyerên di rojên dawî de li navenda Bêdlis û navçeyên Tetwan û Xîzanê qewimîn, anîn ziman.

Keyayan, ji bo dîtina sê karkerên hefteya bihurî ji gundê Engesor ê Tetwanê hatin revandin, alîkarî ji BDP'ê xwestin.

Keyayan diyar kirin ku bûyerên bi vî rengî zerarê didin pêvajoya aştiyê û anî ziman ku ew li benda alîkariya BDP'ê ne.

Hat ragihandin karkerên mijara gotinê Taner Aykût Alp ê ji gundê Egrîtaş ê Tetwanê, Emrûllah Ayaz ê ji Tetwanê û Necîp Şîrîngul ê ji gundê Engesorê ne. Walîtiya Bêdlisê ji revandina karkeran PKK berpirsyar girtibû. Lê belê bûyer heta niha ji aliyê çavkaniyên HPG'ê ve nehatiye piştrastkirin.