Li bajarê Elmanya Munchenê bi daxwaza bicihhatina edaletê çalakî hat lidarxistin.

Ji bo eşkerekirin û cezakirina kujerên komkujiya 9'ê Çileya 2013'an a li Parîsê, ku di encamê de ji damezrînerên PKK'ê Sakîne Cansiz, Nûnera KNK'ê ya Parîsê Fîdan Dogan û endama Tevgera Ciwanan Leyla Şaylemez hatin qetilkirin, çalakiyeke edaletê hat lidarxistin.

Girseya gel a li ber Konsolosxaneya Fransayê li hev civiya, ji hikûmeta Fransayê xwest, kiryarên rastî yên komkujiyê ji raya giştî re eşkere bike û darizîne.

Di daxuyaniya li çalakiyê de hat gotin, "Em ji hikûmeta Fransayê dixwazin bûyerê ronî bike, kujeran derxîne pêşberî dadgeriyê û ceza bike." Di çalakiya ji aliyê Komuna Jinên Kurd a Munchenê, Ciwanên Azad û YXK Munchenê ve hat organîzekirin de peyama "Em sozê didin Cansiz, Dogan û Şaylemez; heta cînayet bê ronîkirin wê çalakiya me bidome" hat dayîn.

Di çalakiyê de wêneyên Cansiz, Dogan û Şaylemez hatin vekirin û dirûşmên "Jin jiyan azadî" hatin qîrîn.