Odeya Muhendîsên Avahiyê (ÎMO) şaxê Amedê der heqê bûyera li Licê ya di encama gulereşandina leşkerên Tirk de ciwanekî Kurd jiyana xwe ji dest da û 9 kes birîndar bûn de daxuyaniyek weşand û êrîş bi tundî şermezar kir. ÎMO'yê xwest darizandina berpirsyarên vê bûyerê nebe mîna komkujiya li Roboskî.

Di daxuyaniya ÎMO ya der heqê mijarê de weha hat gotin:
"Herçend îdîa dikin ku xwepêşandêran "Molotof" avêtine û "gule li qereqolê reşandine" jî, di demeke kin de derketiye holê ku ev îdîa ne rast e. Li gorî şahidên bûyerê welatiyên xwepêşandeneke aştiye û demokatîk a protestoyî lidar dixistin, daxuyanî dane çapemeniyê û dûre çalakiya rûniştinê pêk anîne. Lê belê leşker hatine cihê bûyerê, di navbera şêniyên gund û leşkeran de hevdîtin hatiye kirin û dûre leşkeran bêyî hişyariyê bidin gel, 2 caran gule berdane hewayê, piştre jî yekser gule li ser gel reşandine."

Di daxuyaniyê de hat ragihandin ku dijwariyeke mîna ya Parka Geziyê ya polîsan li Licê rû daye û got, "Îdîa çi dibe bila bibe, tu sedem mafdar nîne ku leşker gule bireşînin ser welatiyên sivîl. Di çalakiyên Parka Gezî de jî hat dîtin ku bi dijwarî û hewldanên kêfî, daxwazên demokratîk nayê tepisandin û ev bersivdayîn ne li gorî ti pîvanên mirovane û demokratîk e. Weke ÎMO, em naxwazin bûyera li Licê jî mîna lêpirsîna komkujiya Roboskiyê bi demê re belavkirin û bê encam were hiştin."

Di daxuyaniyê de hat destnîşankirin ku weke Odeya Muhendîsên Avahiyê ewê şopdarên vê pêvajoya huqûqî bin.