Li navçeya Colemêrg Şemzînanê, çalakiya "Konê Çareseriyê" yê li Kaniya Bermêşê, di roja sêyemîn de bi çalakiyên cûda dewam dike.

"Konê Çareseriyê" yê bi pêşengiya Tevgera Jİnan a Azad û Demokratîk li nêzî Kaniya Bermêş a quntarê Çiyayê Gomanê hat vedan, doh êvarê ji çalakiyên cihê re mêvandarî kir. Rêveberên BDP'ê yên navçeya Şemzînanê, Şaredar Sedat Tore û nûnerên rêxistinên civakî yên sivîl çûn serdana Dayikên Aştiyê yên li binê kon wê hefteyekê nobedê bigirin. Di binê kon de, sînevîzyonek ji wêne û dîmenên komkujiya Roboskî û gerîlayên PKK'ê yên di demên cûda de jiyana xwe ji dest dan, hat pêşandan.

Bi sarbûna hewayê re, welatiyan agir dadan û li dora agir govend gerandin. Her weha tevahiya şevê, balafirên bê mirov ên keşfê li ezmanên navçeyê firiyan.