Yekîtiya Ewropa (YE), ku ji destpêka vê salê û vir ve zêdeyî 500 hezar penaber hatine, tevî ku li gorî herêmên din ên cîhanê hejareke gelekî kêm e, li ser vehewandina penaberan li hev nake.
Yekîtiya Ewropa (YE), ku ji destpêka vê salê û vir ve zêdeyî 500 hezar penaber hatine, tevî ku li gorî herêmên din ên cîhanê hejareke gelekî kêm e, li ser vehewandina penaberan li hev nake. Serokê Komîsyona YE Jean-Claûde Jûncher banga "hîn bêhtir wêrek bin" li welatên endam kir.
Jûncker di rûniştina Parlamenta Ewropayê (PE) ya li Strasboûrgê de peyivî û ji welatên yekîtiyê xwest, ku di mijara parvekirina 160 hezar penaberên hatine Îtalya, Yewnanîstan û Macarîstanê, bi lezgînî biryarê bidin. Jûncker diyar kir ku dem ne dema tirsê ye û got, "Dem dema wêrekî û piştevaniyê ye".
Serokê Komîsyonê got, "Dem ew deme ku mirovahî rûmeta xwe nîşan bide" û xwest pêşniyara wî ya li ser parvekirina 160 hezar penaberan di Civîna Bilind a Wezîrên Karên Hundir a roja Duşemê were qebûlkirin.
Li gorî pêşniyara Jean-Claûde Jûncker, 160 hezar penaberên li Îtalya, Macarîstan û Yewnanîstanê wê di navbera welatên Yekîtiya Ewropayê de bên parvekirin. Elmanya bi rêjeya ji sedî 26'an re xwedî pra herî mezin a parvekirina penaberan e. Fransa rêjeya ji sedî 20, Spanya jî rêjeya ji sedî 12 a kotaya penaberan pejirandine.
Lê belê ji ber ku Komar Çek û Slovakya li hemberî neçariya kota penaberan derdikevin û dixwazin hejmar li gorî 'dilê' welatan bi xwe werin diyarkirin, plana parvekirinê dikeve nava zor û zehmetiyan. Brîtanya ya ku ji aliyê nifûsê ve sêyemîn welatê herî mezin ê Yekîtiya Ewropayê ye li dijî kotaya penaberan derdikeve. Serokwezîr Davîd Cameron duh da xuyakirin ku ew di nava Peymana Schengenê de cih nagirin û ji ber ku 'xwedî sînorên xwe ne' li dijî sîstema kotayê ne.
Di mijara çareseriya pirsgirêka penaberiyê de DYA, Awûstûrya û hin welatên Latîn Amerîka jî daxuyanî dan. DYA diyar kir ku wê heta payîza 2016'an de ji 5 heta 8 hezaran penaberan qebûl bike.
Serokwezîrê Awûsralyayê Tony Abbott ragihand ku tevî 13 hezar 500 penaberên her sal wan qebûl dikin, ew ê 12 hezar kesên din jî qebûl bikin. Di serî de Venezûela welatên Başûrê Amerîkayê jî dan xuyakirin ku ew jî dixwazin tevlî "hewldana navneteweyî" ya ji bo parvekirina penaberan bibin.
