Ji bo Agir Adar (Yûnûs Dolanbay), Bahoz Botan (Erkancan Ecevît), Çekdar Azad (Abdurrahman Tûnç), Diler Arîn (Çiya Yûsûfî), Hogir Gever (Nêçirvan Kaya), Pilin Faraşîn (Erhan Abo), Şervan Amara (M. Salîh Buyukertaş) û Welat Kop (Sînan Ornek) ên roja 23'ê Gulanê li herêma navbera gundên Zêvkan û Kertiniz ên navçeya Colemêrg Geverê jiyana xwe ji dest dan, li Navenda Civaka Demokratîk a Ahmet Kaya ya li Parîsê merasîmeke bîranînê hat lidarxistin.

Di destpêka merasîmê de li ser navê Saziya Malbatên Şehîd û Windayan Hayrî Ûlûdag peyivî. Ûlûdag diyar kir, gelê Kurd xwedî li ewladên xwe yên ji bo wan têdikoşe derdikeve û işaret bi girîngiya xwedîderketina li têkoşîna wan kir.

Nivîskar Ayşe Berktay jî di axaftina xwe ya li vir de diyar kir, têkoşîn bi dayîna berdêlên giran dimeşe û hêza îro bi dest ketiye, bi saya van berdêlan e.

Xalê Şervan Amara Şabah Akşahîn jî da zanîn, Şervan bi 53 hevalên xwe tevlî refên têkoşînê bû û got, "Ez pê serbilind im. Şervan şehîdê me hemûyan e."

Li ser navê Tevgera Jinên Kurd Zozan Serhat axivî û anî ziman, her şehîdek bîrdariyeke lehengiyê ye. Serhat destnîşan kir, mêtîngerî, nokerî û xiyanet wê li Kurdistanê têk biçin.

Berdevkê Civaka Îslamî ya Kurdistanê Mele Hafiz jî qala cihê şehîdan ê di nava Îslamiyetê de kir.

Merasîma bîranînê piştî nîşandana sînevîzyonê bi qîrîna dirûşma "Şehîd Namirin" bi dawî bû.