Yek ji pêşengê Şoreşa Rojava Salih Muslim, di 11 Adara 2026’an de li nexweşxaneyeke Hewlêrê ya lê tedawî dibû jiyana xwe ji dest da û piştre weke gelek bajarên li seranserê cîhanê li bajarê Toronto yê Kanadayê jî hate bibîranîn.
Bîranîn, ji aliyê Navenda Civaka Kurd a Demokratîk a Kanadayê ve hate organîzekirin, gelek Kurdistanî beşdar bûn û bi hestiyariyeke mezin derbas bû.
Qisekeran jiyana Salih Muslim weke ‘’sembola ruhê piştevaniya ku ji Rojava dest pê kiriye û belav bûye hemû Kurdistanê’’ pênase kirin. Hate diyarkirin ku Salih Muslim şopdarê xeteke ku xwe bexşandiye îradeya jiyana hevpar a gelan, edalet û lêgerîna azadiyê bû.
Di merasîmê de Şervan Muslim ê kurê Salih Muslim ê ku di şerê li dijî komên çete yên cîhadîst de şehîd bûye û şervanên Hêzên Ewlehiya Hundirîn ên li taxên Şêxmeqsûd û Eşrefiyê şehîd bûne jî hatin bibîranîn.
Di axaftinan de hate îfadekirin ku fedekariya van berxwedêran nîşaneya herî bi hêz e ku gelê Kurd li çar perçeyan jî bi heman hêviyê dijî.
Nûnerên Navenda Kurd a Demokratîk, diyar kirin ku têkoşîna Salih Muslim di bîra hevpar a gelê Kurd de mayînde bûye û ev yek anîn ziman:
‘’Hevrêyê me Salih Muslim jî tevlî karwanê şehîdên Kurdistanê bû.
Em soz didin ku em ê doza wan mezin bikin û wan tu carî ji bîr nakin.’’
Hevserokê KNK’ê yê Torontoyê jî bîranîneke xwe ya li gel malbata Muslim parve kir û ev yek bû sedem ku li eywanê kêliyên gelekî hestiyar rû bidin.
Merasîm, li gel pêşkêşkirineke sînevîzyoneke têkildarî jiyan û têkoşîna Salih Muslim, Şervan Muslim ê li Rojava şehîd dibe û şervanên Hêzên Ewlehiya Hundirîn ên li taxên Şêxmeqsûd û Eşrefiyê şehîd bûne, bi dawî bû.
Tevahiya rojê Kurdistaniyan seredana xwe domand; qada bîranînê veguherî piştevanî û hesta yekîtiyeke xurt.
