Çalakiya nobedê ya ku parlamenterên HDP’ê li dijî tecrîda li ser Rêberê Gelê Kurd Abdullah Ocalan û astengkirina hevdîtina pê re, dabûn destpêkirin di roja 12’emîn de didome. Parlamenterên HDP’ê dixwazin tecrîd bê rakirin û tavilê bi Ocalan û girtiyên din re hevdîtin bê kirin.

Parlamenterên HDP’ê Mûrat Sarisaç, Îmam Taşçier, Ayşe Surucu, Kemal Bulbul, Erdal Aydemîr, Fatma Kûrtûlan, Huseyîn Kaçmaz, Hasan Ozguneş, Mahmut Togrûl û Celadet Gaydali di roja 12’emîn a çalakiyê de li ber deriyê Meclisê gazî Wezareta Dadê kirin.  

Parlamenterê HDP’ê yê Şirnexê Hasan Ozguneş li ser navê parlamenteran axivî û destnîşan kir ku 23 sal in li Îmraliyê li ser Abdullah Ocalan tecrîd tê kirin û got “Ev tecrîd  ne li gorî pîvanên olê, ne li gorî pîvanên ehlaqî, ne li gorî hiqûqa Tirkiyeyê û ne jî li gorî hiqûqa gerdûnî ye. Tecrîd tenê ne li ser birêz Ocalan tê birêvebirin. Tecrîd bi awayek girankirî li ser tevahiya girtîgehan tê sepandin. Di 2 salên dawî de 142 girtî ji ber nexweş bûn li girtîgehan hatin qetilkirin. Bi sedan girtiyên nexweş li zindanan li ber xwe didin û terkî mirinê hatine kirin. Li zindanan êşkence û zilma heyama 12’ê Îlonê heye.” 

DIVÊ DERIYÊ ÎMRALIYÊ WERIN VEKIRIN

Ozguneş anî ziman ku heke deriyên Îmraliyê bên vekirin wê Tirkiye ji vê jiyana dojehî, şerê qirêj derkeve û ji vê rejîma zilmê rizgar bibe û got: “Tirkiye dikare wisa bigihîje pergalek azadîxwaz, demokratîk û hiqûqê. Em carek din gazî Wezareta Edaletê dikin û dibêjin, divê ev tecrîd were rakirin. Pêwîst e parêzer û malbata birêz Ocalan û girtiyên din hevdîtinê bikin. Em bi hêvî ne û em ê heta dawiyê têkoşîna xwe bidomînin.”