Bi pêşengiya Înîsiyatîfa Azadî ji Abdullah Ocalan re, ji 25'ê Hezîrana 2012'an û vir ve ji bo azadiya fîzîkî ya Rêberê Gelê Kurd Abdullah Ocalan li bajarê Strasbourg ê Fransayê 'Nobeda Azadiyê' tê lidarxistin.

Nobed di hefteya 571'ê de ye. Çalakî vê hefteyê ji aliyê endamên Tevgera Ciwanên Kurdistanê Serhat Keklîk, Ozgur Guner, Mûstafa Ozdemîr û Eyup Kaya ve tê meşandin.

Serhat Keklîk bi navê çalakgeran axivî û got, "Em ji vê derê bang li raya giştî, Parlamenta Ewropayê, bi taybetî jî gelê Kurd dikin. Demeke dirêj e agahî ji Rêberê me nayê wergirtin. Em dixwazin fikarên xwe careke din bînin ziman. Em soza xwe dubare dikin ku ciwan wê ti carî ji xeta Rêberê xwe dûr nekevin û her tim Rêberê xwe biparêzin.

Em ji raya giştî ya Ewropayê re jî dixwazin vê bibêjin; Gelê Kurd li hemberî mêtingeriya ku sed sal in dewam dike, têk neçûye û wê têk neçe. Gelê Kurd wê li çar aliyên cîhanê ji bo azadiya xwe û azadiya Rêberê xwe dest ji têkoşînê bernede. Wê berxwedana xwe dewam bike. Li dijî hêzên mêtinger têkoşîna me wê dewam bike. Em careke din bang li gel û ciwanên Kurd dikin; Heta azadiya Rêberê me û Kurdistanê divê em dest ji berxwedan û têkoşînê bernedin. Ji bo azadiya Rêberê me em bang li her kesî dikin ku tevlî Nobeda Rêbertî bibin."