Li navçeya Pirsûsê ya Rihayê di 14’ê Hezîrana 2018’an de xizm û parêzvanên parlementerê AKP’ê Îbrahîm Halîl Yildiz hevjîn û du kurê Emîne Şenyaşar qetil kiribû. Emîne Şenyaşar tevî kurê xwe Ferît Şenyaşar ê ku di êrîşê de birîndar bûbû ji 9’ê Adara 2021’an û vir ve li pêşiya Edliyeya Rihayê di çalakiyê de ne.

Di roja 583’emîn a Nobeta Edaletê de malbatê dîsa dest bi çalakiya xwe kir. Mehmet Şenyaşar ê ku hatibû berdan jî tevlî çalakiyê bû.

Ev hefteyek e dora qada nobetê dihat girtin. Piştî ku bariyer hatin rakirin, vê carê dora qadê bi wesayîtan hate girtin û ew der kirin cihê parkkirina wesayîtan.

Hinek blokên din ên beton li blokên beton ên li pêşiya Edliyeyê hatin zêdekirin. Emîne Şenyaşar diyar kir ew ê li hemberî vê astengkirinê çalakiyê bidomînin.

Îro jî rêveber û endamên şaxên OHD’ê yên Dîlok û Rihayê hatin serdana malbatê.

Malbatê li ser hesabê xwe yê medyaya dîjîtal Desteya Dozger û Dadgeran, Wezareta Edaletê û Wezîrê Edaletê Bekîr Bozdag etîket kir û got “Bi fermana serdozger re qada ku me nobeta edaletê lê digirt bi bariyerên polîsan hate girtin û di roja 7’an de hate rakirin. Li Rihayê qanûn tune. Gelo li Edliyeya Rihayê çi diqewime? Em bang li Desteya Dozger û Dadgeran dikin ku bila peywira xwe bi cih bînin.”