Kongreya Demokratîk ya Gelan (HDK) li girtîgeha Rihayê bi zindî şewitîna 13 girtiyan bi meşekê şermezar kir.

Endamên Kongreya Demokratîk ya Gelan li ber YKM ya Îzmîrê hatin ba hev û ji bo şewitîna 13 kesên li girtîgeha Rihayê jiyana xwe jidest dan heta qada Konakê meşiyan. Di meşa ku pankarta li ser, "Dewleta qatil li derve û hundir li ser kare, li girtîgeha Rihayê 13 girtî hatin qetilkirin" nivîsandî hat vekirin de dirûşmeyên wekî; "Bila zîndan bên valakirin, ji girtiyan re azadî", "Wezîrê Edaletê Sadullah Ergîn îstîfa" hatin berzkirin.

Piştî meşê endama Kongreya Demokratîk ya Gelan Hatîce Kivrik daxuyanî da û diyar kir ku, dewlet çawa ku di bûyera tacîz û destdirêjiya li girtîgeha Pozantiyê di komkujiya li girtîgeha tîpa E ya Rihayê de jî ketiye nava hewldana xwepak nîşandanê. Kivrik anî ziman ku, dewlet li şûna berpirsan derxîne holê û bidarizîne rojnamevanên ku nûçeyên van bûyeran çêdikin digre û got; "Li koguşên ku dibê 5-6 kes lê bimînin bi dehan kes lê dimînin. Ev yek rastiya girtîgehên li ser vê erdnîgariyê radixîne li ber çavan. Bombeyên gazê, terora polîsan û girtîgehên ku veguherîne goristanan dê têkoşîna bindestan neçewisîne."

Kivrik banga li dijî komkujiyan daketina qadan û qêrîna wekheviyê li her kesekî kir.