Festîvala ku sibê wê li Bahnohofstrasse 24, 4563’ê were lidarxistin bi şîara “Çi dibe bila bibe, wê dawiya wê mûhteşem be” ji aliyê Ciwanên Azad û Jinên Ciwan ên Azad ên Swîsreyê tê organîzekirin.

Di festîvalê de ya ku bi pêşengiya Ciwanên Azad û Jinên Ciwan ên Azad di çarçoveya “Azad Bike” tê lidarxistin wê çalakiyên sportîf û çandî werin amadekirin.

Di festîvalê de ji xeynî çalakiyên çandî wê Serhado, Nûarîn, Hîvron, Rodî, Can Med, Mahabad, Azad Karahan û koma Govend/Folklorê derkeve ser dikê.

Endamê Komîteya Amadekar ê festîvalê Ferît Dûrûk bang kir ku, “Ciwanên Kurdistanê yên li Ewrûpayê dijîn divê li dora Hasan Kiziler, şehîdên meha Gulanê û şehîdên têkoşîna azadiyê ya Kurdistanê xwe birêxistin bikin û divê Rêbertiya Azad, Kurdistana Azad û Jiyana Azad ava bikin.”

Dûrûk bal kişand ser polîtîkayên pergalê yên li ser ciwanan û diyar kir ku ciwan bi çandeke Kurdistanî dikarin azad bibin. Dûrûk got ku ji bo azadiya Ocalan û li hemberî êrîşên qirkirinê yên Kurdistanê divê ciwan berxwedanê geştir bikin.

Dûrûk gelê Kurd ê welatparêz û dostên wan jî vexwend festîvalê û got, “Em bi giyanê Çiyageran xwedî li şehîdên xwe derkevin û em hemû gelê xwe yê welatparêz û şoreşger vedixwînin festîvalê.”

Hasan Kiziler (Mazlûm) ê ku di rojnameyên Roja Ciwan/Stêrka Ciwan û Berxwedanê de dixebitî di sala 1995’an de beşdarî PKK’ê bû. Hê li gerîllatiyê meheke wî neqediyabû di êrîşa hewayî ya li ser Herêmên Parastinê yên Medyayê yên Xakurkê tevî 7 hevalên xwe şehîd bû. Her sal li ser navê wî li Swîsreyê festîvala ciwanan tê lidarxistin.