Serdozgeriya Komarê ya Amedê di bin navê ‘PKK/KCK’ê de li dijî DBP’ê operasyoneke qirkirina siyasî da destpêkirin. Di hema demê de li hemû avahiyên bajêr ên DBP’ê de lêgerîn hatin destpêkirin.

Di çarçoveya lêpirsînê de Amed di serî de li 9 bajarên Kurdistanê polîsan girtin ser avahiyên partiyê û malan.

Hevserokê Giştî yê DBP’ê Keskîn Bayindir jî di nav de Hevserokê DBP’ê yê Şirnexê Zekî Îrmez, Hevserokên DBP’a Wanê Şengul Polat û Harûn Okay, Hevserokê DBP’a Rihayê Hîdayet Enmek, Hevserokên DBP’a Dîlokê Ethem Unal û Zelîha Aslan, Hevserokê DBP’a Mêrdînê Şerafettîn Aslan û Sureyya Dundar û Hevserokê DBP’ê ya bajarê Agiriyê Melîk Ozmuş hatin destgîrkirin.

Li Mûşê jî xebatkarên DBP’ê Mîkaîl Kiliç û Celal Doner, Farûk Kuçukçelebî û Yilmaz Tamkan hatin destgîrkirin.

Di çarçoveya heman lêpirsînê de polîsan girtin ser Navenda Giştî ya DBP’ê ya li Enqereyê. Di dema serdegirtinê de ketin û derketina ji kolanê hate qedexekirin, qeydên defterê yên partiyê, dokuman û gelek belge hatin desteserkirin.

Polîsan di dema serdegirtinê de wêneyê parlementerê DEP’ê Orhan Dogan ê ku di 2’ê Adara 1994’an de parlementerita wî hatibû xistin, wêneyên Cîhan Denîz û Husnu Ablay ên ku dema Endamên Meclîsa DTP’ê bûn û di sala 2008’an de di qezaya trafîkê de jiyana xwe ji dest dabûn jî desteser kir. Tevî wêneyan gelek pirtûk jî bi îddîaya ‘delîla sûc’ e hate desteserkirin.