Herikîna gel a ber bi qada pîrozbahiyê dewam dike. Bi destpêkirina bernameya pîrozbahiyê re dirûşma "Şehîd namirin" li qadê bilind bû.

Piştî ku koma dahol û zirneyê derkete ser dikê, girseya gel demeke dirêj govend gerand. Li qadê pankartên bi nivîsa "Emperyalîzm dijminê sereke ye, gel xwişk û birayê hev in" û "Bijî azadî, bimire koletî" hatin hildan.

Hevserokên DEM Partiyê yên Stenbolê Arîfe Çinar û Çinar Altan ji girseya bi coş re axivîn.

Arîfe Çinar bal kişand ser girîngiya Newrozê û anî ziman ku pîrozbahiyên îsal ji bo Kurdan û gelên Tirkiyeyê krîtîk in.

Arîfe Çinar diyar kir ku divê ji bo çareseriya demokratîk gavên şênber bêne avêtin û Newroz li Rêber Apo pîroz kir.

Di dema axaftinan de tim û tim dirûşmên ji bo azadiya Rêber Apo hatin qîrîn.

Çinar Altan di axaftina xwe de bal kişand ser aştiyeke adil û azadiyê û destnîşan kir ku têkoşîn wê dewam bike.

Altan her wiha di serî de Rêber Apo ji bo azadiya hemû girtiyên siyasî bang kir.

Di axaftinan de Mazlûm Dogan, Mahîr Çayan û Sirri Sureyya Onder hatin bîranîn.

DANEZAN: TI TARÎTÎ BÊDAWÎ NÎNE

Pîrozbahiya Cejna Newrozê ya Stenbolê bi hemû coşa xwe didome. Di pîrozbahiyê de danezana hevpar a Hêzên Ked, Aştî û Demokrasiyê hate xwendin.

Di danezanê de gel hate silavkirin û Neroza hate pîrozkirin. Hat gotin ku Newroz, ne tenê hatina biharê lê di heman demê de serhildana li dijî zilmê, kedxwarî, zext û înkarê ye.

Bi domdarî îşaret bi şerên li Rojhilata Navîn û êrişên ser Rojava hate kirin û hate gotin ku pêdiviya vê xakê ne bi zêdetir bombebaran, gef û êrişan lê pêdiviya wê bi wekheviya gelan, aştî û azadiyê heye. Êrişên li dijî Sûriyeyê li dijî Elewiyan hatin bibîrxistin û hate gotin ku divê tu gel û bawerî nebin hedef û ew vê qebûl nakin. Her wiha bertek nîşanî êrişên ser Rojava da û hate gotip ku ew li dijî êrişên ser têkoşîna hevpar, jiyana demokratîk a li ser bingeha weheviyê û azadiyê ne.

Hat destnîşankirin ku êrişên emperyalîst ên li dijî Îranê herêmê ber bi şerekî mezintir û bêîstiqrariyeke mezintir dibe. Bi domdarî wiha hate gotin: “Li Rojhilata Navîn çareserî, di tayînkirina çarenûsa xwe ya gelan, wekhevî û xwişk-biratî ye.”

Her wiha îşaret bi xizanî, kedxwarî, bêkarî, krîza aborî ya li Tirkiye û Kurdistanê hate kirin û hat gotin ku çavkaniyên cemaweriye pêşkeşî komeke sermayedar tên kirin. Bi domdarî zext, mudaxileyên li dijî îradeya gel, rejîma qeyûm û hwd. hatin şermezarkirin û wiha hate gotin: “Demokrasî, naskirina îradeya gel, azadiya xwebirêxistinkirinê, hemwelatiya wekhev û parastina jiyana civakî ya li dijî rejîma zextê ye.”

Di danezanê de hate destnîşankirin ku têkoşîna wekhevî û azadiyê ya jnan û têkoşîna kedkar û karkeran ji hev cuda nînin û hate gotin ku dê serî li ber serweriya mêr, tundî, paşverûtî û polîtîkayên jiyana jinan dorpêç dikin netewînin. Bi domdarî wiha hate gotin: “Tu tarîtî bêdawî nînin.”

Herî dawî jî wiha hate gotin: “Agirê Kawayê Hesinkar li dijî zilma Dehaq hilkirî îro rêya me ronî dike. Ev agir, li dijî şer aştiyê, li dijî kedxwariyê kedê, li dijî înkarê wekheviya gelan û li dijî paşverûtiyê jî agirê azadiyê ye. Em ê berxwedan û hêviya Newrozê mezin bikin. Em ê bi hev re li ber xwe bidin. Em ê bi hev re bi ser kevin.”