Beriya Qetlîama Parîsê ya 23’ê Kanûna 2022’an ku bi organîzekirina desthilatdariya AKP-MHP’ê li dijî Navenda Çanda Kurd hat kirin û sê aktîvîstên Kurd şehîd bûn, bi sê rojan gotinên Fahrettîn Altûn ê berdevkê rejîma Erdogan ku Fransa ji xwe re kir armanc, balkêş in.

Altûn ku 20’ê Kanûnê li paneleke bi navê “Têkiliyên Tirkiye-Fransayê: Fersend û Xwestina Meydanê Ji Hev Re’’ axivî, ev daxwaz kirin: “Em bi xemgînî dibînin ku PKK’yî li Fransayê ne. Tirkiye ji Fransayê ku hevpeymanê wê yê NATO’yê ye hêvî dike ku dawî li kar û xebatên PKK’ê û pêvekên wê bîne.’’

GEFA ‘HÛN Ê JÎ JÊ ZIRARÊ BIBÎNÎN’

Altûn, bi taybetî ji bo planên dewleta Tirk ê dagirkirina Bakur û Rojhilatê Sûriyeyê daxwaza piştgiriyê ji Fransayê kir û bi gotina: “Em ê bi derfetên xwe li têkoşîna xwe dewam bikin” gef li Fransayê xwar. Altûnê ku wek “Wezîrê propagandayê’’ yê desthilata AKP-MHP’ê tê zanîn, bi van gotinan Fransa ji xwe re kir armanc:

“Lobiyên neyarên Tirkiyeyê yên li rojava yan jî kampanyayên dezenformasyonê yên rêxistinên terorîst ên wek PKK/YPG û FETO’yê jî potansiyela xwe ya zirarê bidin têkiliya navbeyna her du welatan û zirarê bide Fransayê heye. Divê têkiliyên Tirkiye-Fransayê, nebin bi qurbana hesabên ehdên siyasî yên demkurt ên rêxistinên terorê. Tirkiye piştgiriya ku heq dike nastîne. Ji wê boneyê em di bicihanîna hewcedariyên ji bo ewlehiya xwe ya neteweyî û têkoşîna li dijî terorî de, bi biryar in ku bi hemû derfetên xwe dewam bikin.”