Kurdistaniyên li paytexta Federasyona Rûsya Moskowayê dijîn, bi wesîleya 38. salvegera damezrandina PKK'ê li hev civiyan. Pîrozbahî ji aliyê Otonomiya Federal a Çandî û Neteweyî ya Kurdên li Rûsyayê û Komîteya Çandê ya Kurd ve hat organîzekirin. Tevî Nûnerê Rêveberiya Xweser a Rojava yê li Moskowayê Rodî Osman û Nûnerê Yekîtî Niştimanî Kurdistan (YKN) yê li Moskowayê Şehevan Herkî, gelek Kurdistanî tevlî bûn. Çalakî li salona konserê ya Mala Gel a Lûnaçerskî pêk hat û ji bo bîranîna şehîdên Kurdistanê bi deqeyeke rêzgirtinê dest pê kir.

Li ser girîngî û wateya rojê siyasetmedarê Kurd Adil Cotkar axivî. Cotkar salvegera damezrandina PKK'ê li her kesî pîroz kir û got, "PKK a ku bi pêşengiya Rêber Apo ava bû, ji gelê Kurd re bû hêviya azadiyê û di vê oxirê de destanên mezin nivîsand. AKP û hevkarên wê, ji bo destketiyên gelê Kurd ji holê rakin, siyaseteke qirêj dimeşînin. Lazim e gelê me bi rengekî tund li ber van dek û dolaban rabe. Rewşa heyî ya siyasî nîşan dide, ku zivistan wê bi têkoşîneke xurt derbas bibe. Girîng e gelê me yê li derveyî welat dijî, xwe li gorî vê yekê amade bike."

Piştî Cotkar, Nûnerê Rêveberiya Xweser a Rojavayê Kurdistanê Rodî Osman, Nûnerê YNK'ê yê Moskowayê Şehevan Herkî, Hevseroka Otonomiya Federal a Çandî û Neteweyî ya Kurdên li Rûsyayê Liyana Simoyan, endama Rêveberiya Tevgera Jinên Kurd li Rûsyayê Nîgar Patiyeva, Seroka Organîzasyona Jinên Kurd li Moskowayê tara Qadir û nûnerên Kongreya Êzidiyên li Rûsyayê derketin ser dikê û 38. salvegera damezrandina PKK'ê pîroz kirin.

Li dû axaftinan, hunermend Arman, Barî, Dato, Mulaz Îsko û hunermendên herêmî hunera xwe pêşkêş kirin.