Parlamenterê HDP'ê yê Amedê Ziya Pîr ku duh hate binçavkirin û li Dadgeha Ceza ya Sûlhê ya Nobedar bi şertê kontrolê û qedexeya derketina derveyî welat hat berdan, binçavkirina xwe, hevserokên partiya xwe û hevalên xwe yên parlamenter nirxand.

Pîr diyar kir, ew duh bi şev saet di 02:00 de hatine binçavkirin û tevî Hevserok Selahattîn Demîrtaş birine Midûriyeta Emniyetê ya Amedê, li heman hucreyê hatine bicihkirin. Pîr da zanîn, ku piştre saet di 05:30 de ew bi hev re derxistine Eliyeya Amedê û heta saet 08:00 ê danê sibehê li korîdorên edliyeyê li benda parêzeran mane.

Pîr ragihand, dema Demîrtaş bi parêzerên xwe re hevdîtin dikir, li navçeya Baglarê teqînê rû da û anî ziman, piştî teqînê polîsên li cem wan bûn em tirsiya bûn hem jî agresîf bûbûn. Pîr da xuyakirin, ku di dema teqînê de Sirri Sureyya Onder û Hevseroka Giştî Fîgen Yuksekdag li Şaxê TEM'ê bûn û got, "Dema anîn cem me, ji ber teqînê toz li ser kincê Xanima Fîgen û Sirri Beg hebû. Lê birîndar nebûn. Piştî teqînê, polîsan sixêfên gelekî giran li Onder û Yuksekdag kirin." Pîr destnîşan kir ku moralê hevalên wan baş e.

Pîr diyar kir daxuyaniyên Serokwezîr Bînalî Yildirim û Wezîrê Edaletê Bekîr Bozdag ên li ser binçavkirinan hemû derew in û anî ziman, li dijî wî heta niha ti doz nehatiye vekirin û kaxizeke bangawaziyê jî nehatiye şandin.

Pîr got, "Ez ne li bendê bûm ku di vî warî de durust bin" û wiha dewam kir: "Ya ku li dijî hevserokên me, hevalên min û min tê kirin, lîstikeke şano ye ku li Qesrê hatiye nivîsandin. Ev lîstik li hin edliyeyên Kurdistanê tên lîstin. Weke HDP em ê ji niha û pê ve xebatên xwe xurtir bimeşînin."