Fermandariya YPG'ê ya Helebê, der barê êrîşên komên çete yên li hemberî sivîlên li taxa Şêxmeqsûd a li Helebê de, daxuyaniyeke nivîskî weşand.

Daxuyanî bi vî rengî ye:

"Destpêkê em hemû şehîdên şoreşa Sûriye ya pîroz bibîr tînin, azadiyê ji girtiyên xwe re dixwazin û ji bo birîndaran jî şîfaya lezgîn hêvî dikin.

Wekî Yekîneyên Parastina Gel li taxa Şêxmeqsûd a bajarê Helebê em bi tundî kiryarên çeteyên El-Nûsra, Ehrar El-Şam, Tûgaya Sûltan Mûrad û Tevgera Nûreddîn El-Zenkî ku îstîxbaratên dewleta Tirk ên Erdogan li pey wan disekinin û piştgiriya wan dikin, şermezar dikin. Van çeteyan ambargo danîn ser taxê û tax dane ber topan. Çete welatiyên sivîl armanc digirin û dixwazin welatiyan bi vê ambargoyê fetisînin.

Em û birayên xwe Artêşa Azad ji destpêka şoreşa Sûriye ya pîroz ve em di yek xendekê de li dijî rejîma El-Baas û çeteyên wê El-Nûsra û hevkarên wê disekinîn.

Em ê heta serketinê û heta dawî lêanîna rejîma desthilatdar li ser soza ku me daye gelê xwe bimînin. Em ê hemû xaka Sûriyeyê ji gemara van çeteyan paqij bikin. Em careke din dixwazin diyar bikin ku em naxwazin şer birayên xwe yên Artêşa Azad bikin, eger di navbera me û wan de şerek derkeve, wê ev bikeve xizmeta rejîma El-Baas. Di dema niha de aliyên ku dixwazin şer bikin bi DAIŞ û rejîmê re ne.

Birayên me yên Cebhet El-Şamiye bi daxwazeke fermî ya fermandariya Cebhet El-Şamiye ji taxê derketine. Me piştî ku ew derketin nuqteyên wan girtin da ku rejîm derbasî nebe."