Parlamenterê Tevgera Goran Bestûn Faîk da xuyakirin, ku ji nû ve destpêkirina diyalog û muzakereyên bi Ocalan re, wê bersiva herî rast a ji bo deklarasyona çareseriyê ya KCK'ê be û got, "Divê êdî were dîtin; bi zext û operasyonan Kurd tesfiye nabin."

Wekîlê Goran Faîk, deklarasyona çareseriyê ya KCK'ê û êrîşa li Dîlokê ji ANF'ê re nirxand û diyar kir, divê dewleta Tirk rêya zext, şîdet û şer derhal biterikîne û bersiveke erênî bide deklarasyonê.

ÇARESERÎ BI YEKALÎ PÊK NAYÊ

Faîk got, "Gava destpêkê ya ji bo vê; rakirina tecrîda li ser Rêberê Gelê Kurd Abdullah Ocalan û ji nû ve destpêkirina diyalog û muzakereyê ye." Faîk da zanîn, pirsgirêka Kurd bi gavên yekalî çareser nabe.

Parlamenter Bestûn Faîk diyar kir, hêzên bang li KCK'ê kirin, divê ji niha û pê ve bi berpirsyariyên xwe rabin û wiha dewam kir: "Ev yek ne tiştekî welê ye, ku bi tenê bi gava Kurdan pêk were. Girîng e her kes vê rastiyê bibîne û zextê li aliyê din bikin ku bi berpirsyariya xwe rabe. Eger tê xwestin pirsgirêk were çareserkirin, divê yekser bi Ocalan û bi KCK'ê re diyalog were kirin. Ji bilî vê, ti rêyeke çareseriyê nîne. Ji ber ku têkoşîna azadiyê ya Kurdan bi zext û operasyonan tesfiye nabe. Ev yek bi zelalî hatiye dîtin."

Parlamenterê Tevgera Goran Faîk êrîşa li Dîlokê li hemberî Kurdan hat kirin şermezar kir û got, "Ev yek êrîşeke qirêj e ku li hemberî gelê Kurd hatiye kirin. Ev êrîş ji aliyê wan hêzên ku hebûna Kurdan înkar dikin, hewl didin pêşî li yekîtiya Kurdan bigirin û hêza wan berxwedanê bişikînin, hatiye kirin."