Azîz destnîşan kir, ku heta Ocalan azad nebe, nepêkane pirsgirêka Kurd çareser bibe û diyar kir, şert û mercên heyî yên tecrîdê, rûyê faşîst ê dewleta Tirk careke din nîşan daye.

'EZ BI TUNDÎ TECRÎDÊ ŞERMEZAR DIKIM'

Parlamenterê Tevgera Goran got, "Ez tecrîda li ser Ocalan bi tundî şermezar dikim" û wiha dewam kir: "Dewleta Tirk ji ber ku ji nêrînên Ocalan ditirse, Rêberê Gelê Kurd di nava tecrîdê de radigire. Xuya ye dewleta Tirk ji tevgera Kurd û bandora Ocalan a li siyaseta Kurd ditirse, lewma serî li vê rêbazê dide. Pêkanîna li hemberî Ocalan pêkanîneke faşîst e. Ev yek hêza mezin a ramanî ya Ocalan û tirsa dewleta Tirk a ji vê yekê radixe pêş çavan."

'ÇARESERÎ BI AZADIYA OCALAN DIBE'

Azîz diyar kir, heta Ocalan azad nebe wê pirsgirêka Kurd her mezin bibe, bixitime û got, "Çareseriya pirsgirêka Kurd bi azadiya Ocalan dibe. Lewma eger bi rastî jî dewleta Tirk dixwaze pirsgirêka Kurd çareser bike, divê dest ji vê pêkanîna xwe ya faşîst berde û Ocalan azad bike."

'GIRÎNG E HEMÛ HÊZÊN SIYASÎ YÊN KURD ZEXTÊ LI DEWLETA TIRK BIKIN'

Azîz da zanîn, dewleta Tirk ji ber xwe ve dest ji polîtîkayên li hemberî Ocalan bernade û bang li hêzên siyasî yên Kurd kir ku zextê li dewleta Tirk bikin.

Azîz got, "Divê nekevin nava ti fikar û hesaban û yekser ji dewleta Tirk bixwazin ku Ocalan azad bike. Ji bo vê jî divê karekî berfireh bê meşandin."