Doza ku bi îdîaya "propaganda rêxistinê" li her 9 kesan hate vekirin, li Dadgeha Cezayê Giran a Erdîşê pêk hat.

Erol Cengîz, Kenan Ûltar, Şaban Tekîn ên li Girtîgeha Tîpa T a Wanê ne, bi rêya sîstema deng û dîmen (SEGBÎS) tevlî rûniştina dozê bûn. Di rûniştinê de ku parêzer lê amade bûn, ji ber guhertina heyetê, rapor ji nû ve hatin xwendin.

Erol Cengîz parastina xwe bi Kurdî kir. Şexsên din jî gotin, ku ew bi parêznameya xwe ya beriya niha ve ne.

Piştî ku parêzeran parastin kirin, rêveberê berê yê HDP'ê Tûrgût Bayramhan hate berdan. Li Cevdet Zîlanli, Şaban Tekîn, Haydar Tenîk, Kenan Ûltar, Ozgur Denîz, Erol Cengîz, Nefîse Taylan û Elvan Çetîn, bi îdîaya 'propaganda rêxistinê' salek û 8 meh cezayê girtîgehê hate birîn.

Di gilînameya dozgeriyê de, axaftina Serokê Komîteya Amadekar a Pîrozbahiya Newrozê Erol Cengîz ku bi gotina "Em Cejna Newrozê ya gelên Rojhilata Navîn pîroz dikin" dest pê kir, weke sûc hate nîşandan. Her wiha hat îdîakirin, ku pêşkêşvana pîrozbahiyê Nefîse Taylan jî girseya gel a ku dirûşma "Bijî Serok Apo" diqîriya, tehrîk kiriye.

Di gilînameyê de hat ragihandin, ku hunermendê herêmî Kenan Ûltar bi stranên xwe yên bi Kurdî gel sor kiriye û ji ber vê yekê jî gel dirûşma "Bijî Serok Apo" qîriya ye.

Wekî din, wêneyên Rêberê Gelê Kurd Abdullah Ocalan û pankartên li qadê hatin daliqandin weke "propaganda rêxistinê" hatin nîşandan.