Celal Ozkan (Her Bijî) ku ji ber koçberiya ji neçarî çûbû Elmanyayê û li gelek qadan xizmetên mezin ji gelê Kurd re kir, ji ber nexweşiya kanserê, li Nexweşxaneya Lêkolîn û Perwerdeyê ya Mehmet Akîf Înan a li Rihayê, ku 20 roj bû dihat tedawîkirin, jiyana xwe j dest da.

Ozkan li Ewropayê nexweş ketibû û ji bo dema xwe ya dawî li welêt derbas bike, beriya niha bi 10 mehan vegeriyabû navçeya Pirsûs a Rihayê. Beriya niha bi 20 rojan, nexweşiyê ji nişka ve lê giran kir û ew rakirin nexweşxaneyê. Ozkan îro koça xwe ya dawî kir. Cenazeyê Ozkan wê îro danê nîvro li Goristana Şêx Nasir a li Pirsûsê bê veşartin.

Celal Ozkan li Ewropayê, bûbû endamê Kongreya Neteweyî ya Kurdistanê (KNK), endamê KONGRA GEL, yek ji damezrînerên Heyva Sor a Kurdistanê û MEYA-DER a Ewropayê bû.

Ozkan bavê endamê PKK'ê Îsmet Ozkan bû, ku di sala 1982'an de tevî Rêxistina Rizgariya Fîlîstînê li dijî Îsraîlê şer kir û jiyana xwe ji dest da. Ji bilî Îsmet, 2 zarokên din ên Ozkan li nav refên PKK'ê jiyana xwe ji dest dan.