Berxwedana greva birçîbûnê ya bêdem-bêdorveger a li Amedê, ku ji bo hevdîtin bi Rêberê Gelê Kurd Abdullah Ocalan re were kirin destpê kir, di roja 7'an de ye. Serdanên ji bo çalakgeran jî dewam dikin.
50 dildar bi pêşengiya KCD, HDK, KJA, DBP û HDP'ê ev 7 roj in di greva birçîbûnê de ne.
Berxwedêrên ku bi moraleke mezin çalakiya xwe didomînin, bi sporê û xwendina rojnameyê dest bi rojê kirin. Ji saet 10:00 û pê ve jî mêvan tên serdana berxwedêran.
Hevşaredara Bismilê Cemîl Emînoglû, nûnerên rêxistinên DBP û HDP ên Bismil û Wêranşarê û bi sedan kesî îro çalakger ziyaret kirin. HDP û DBP'yiyên ji Bismilê hatin, qurnefîl dan berxwedêran.
