PYD'ê li ser gotinên Mesûd Barzanî, ku dagirkirina xaka Rojava û Sûriyeyê ji aliyê Tirkiyeyê ve rewa nîşan dide, daxuyaniyeke nivîskî weşand.

Di destpêka daxuyaniyê de hat ragihandin, ku Barzanî bi helwesta xwe, dagirkeriya Tirkiyeyê ya li axa Rojava û Sûriyeyê re rewa dike û hat gotin: "Surprîza ku Barzanî piştî serdana xwe ya Enqereyê bilêv kir û got, wê di demeke kurt de pêk were, bi dagirkirina Cerablûsê û şerê li dijî Kurdan, eşkere bû bê çi ye. Wan êrîşî destketiyên Rojava û Sûriyê yên ku bi saya xwîna bi hezaran şervanên YPG/YPJ’ê û tevahiya hêzên Sûriyê yên demokratîk hatin bidestxistin kirin."

Di dewama daxuyaniyê de hat gotin, "Hevdîtina Barzanî ku li ser kanala France 24 hatiye weşandin, dijberiya ji bo gelê Sûriyeyê û tevahiya pêkhateyên Rojava û Bakurê Sûriyê ye. Ev helwestên Barzanî hewldana rewakirina dagirkeriya Tirkiyeyê ya li axa Rojava re ye. Her wiha dijberiyeke li dijî Projeya Çareseriya Demokratîk a Federaliya Demokratîk, ku tekane rêya çareseriya ne tenê ji bo doza kurd, ew çareseriyeke ji bo tevahiya Sûriyê re ye."

PYD'ê diyar kir, ew kiryar û helwesta Serokê PDK'ê Mesûd Barzanî qebûl nakin û got, "Ev partî her wiha destê dide rêveberên Partî Demokratîk Kurdistanî-Sûriyê jî. Her wiha wan li dijî partiya me sor dike. Em ji Bazanî re dibêjin, li şûna ku dijberiya me bike bila, ji bo  lidarxistina kongreya navneteweyî gavê bavêje."