Fermandariya Biryargeha Navenda Parastina Gel (NPG) da xuyakirin, ku rejîma AKP'ê ya mêtînger-faşîst roja 2'ê Gulanê li herêma Licê ya Amedê operasyonek pêk aniye û got, "Di vê operasyona hewayî û bejahî de tevî Endamê Konseya Leşkerî ya HPG'ê Azad Sîser û ji fermandarên hêja yên HPG'ê Çekdar Amed şeş hevalên me şehîd ketin."

Di daxuyaniya NPG'ê de hat gotin, "Piştî vê êrîşa xayin a dijmin, li xelekên şehadetê yên dîroka têkoşîna me, xeleke din zêde bûye. Li ser bingeha van şehadetan wê li eyaleta Amedê şer û têkoşîn xurtir bibe."

Daxuyaniya Fermandariya Biryargeha NPG'ê bi vî rengî dewam kir:

'HEVALÊ AZAD DA SER ŞOPA EGÎDAN'

"Hevalê Azad Sîser ji nava gelê me yê welatparêz ê Garzanê derketiye û mezin bûye. Ji Êlih a xwedî hestên xurt ên welatparêziyê, di sala 1992'an de tevlî refên partiyê bû. Di pêvajoyên girîng ên pratîkê de derbas bû, bû xwedî erk û li gelek herêmên Kurdistanê bi wezîfeya xwe rabû. Bi taybetmendiyên xwe yên paqij, durust û wêrekî da ser şopa Egîdan û bû xwedî meşeke giranbuha. Bi dilsozî û biryardariya xwe ya bi gel û doza xwe ve, di pratîka xwe de nîşan da ku ewladê gelê kurdistanê ye. Bi jiyan û sekna xwe ya şoreşgerî, bû fermandarek û rê nîşanî ciwanên Kurdistanê da.

HEVALÊ ÇEKDAR BI RUHÊ APOYÎ YÊ FEDAÎ LI REFÊN HERÎ PÊŞ ŞER KIR

Hevrê Çekdar Amed, ewladekî leheng ê Amed a berxwedêr bû, ku bi taybetmendiyên xwe yên berxwedêrî û wêrekî derdiket pêş. Li Amed a hestên welatparêziyê lê xurt in ji dayik bû, mezin bû û di salên 90'î de tevlî nava refên partiyê bû. Di têkoşîna xwe de sekneke hêjayî lehengî û welatparêziya gelê Amedê nîşan da. Fermandarekî ku bi ruhê fedaî yê Apoyî, bi rengekî milîtanî cihê xwe li refên herî pêş ê şer girt. Hevalê Çeko ku bi cesareta xwe her tim derdiket pêş, kedeke mezin da têkoşînê û weke hevalek^fedekar cihê xwe li çiyayên Kurdistanê û di dilê gelê me de girt.

'WÊ HESAB BÊ PIRSÎN'

Rejîma AKP'ê, ku ji Tîrmeha 2015'an û vir ve bi qedandina pêvajoya çareseriya demokratîk a Rêberê me, di oxira hesabên xwe yên desthilatdarî û qesrê de li hemberî gelê me dest bi pêleke bêsînor a êrîşan kir, îro di nava rewşeke xitimandî de ye. Gelê me bi îlanên xwerêveberiyê û berxwedana xweparastinê li bajaran bersiv da van êrîşan. Gerîla jî qadên bejahî bi pêngavên bersivdayînê ve ev êrîşên dijmin bêbersiv nehiştin û derbên giran li wan dan. Vê berxwedana gelê me, plan û armancên kirêt ên çeteyên qesra AKP'ê eşkere kiriye û raxistiye pêş çavan. Gelê Êlihê yê welatparêz, di serî de fermandar Egîd gelek fermandar daye vê têkoşînê. Çawa ku li ser şopa Egîdan mîna fermandarê hêja yê berxwedana Sûrê Çiyager û Azad derxist holê, gelê Êlihê û tevahiya gelê Kurdistanê yê welatparêz xwedî wê potansiyelê ne ku hînê bi sedan fermandarên milîtan bafirîne. Divê neyê ji bîrkirin, her ciwanekî li kolanên Amedê dimeşe, namzet e ku bibe fermandar Çeko. Di vê dema dîrokî ya têkoşîna me de şehadeta Azadan û Çekoyan ti carî windahî nîne. Weke ku di sedan mînakên li dîroka me ya têkoşînê tê dîtin, ev xeleka hêja ya şehadetê jî wê ji bo Amedê û tevahiya gelê Kurdistanê bibe çavkaniya hêzê û têkoşîna berxwedanê mezintir bike. Xwîna ti ji şehîdên me wê li erdê nemîne û hesabê wan wê bê pirsîn. Li ser vê bingehê em bang li gelên welatparêz ê Êlih û Amedê dikin, li ser xeta van ewladên xwe yên hêja têkoşînê mezintir bikin û xwedî li têkoşîna wan derkevin. Em ji gelê xwe û malbatên xwe yên hêja yên şehîdan re sersaxiyê dixwazin."