Kurdistaniyên li bajarê Soçî yê ser bi Federasyona Rûsyayê dijîn, di şexsê gerîlaya PKK'ê Gulnaz Karataş (Bêrîtan) de hemû cangoriyên têkoşîna azadiyê ya Kurd bi civînekê bibîr anîn û 1'ê Mijdarê Roja Kobanê ya Cîhanê silav kirin.

Di civîna li salona konferansê ya otela Soçî Jemşuşîna de, Serokê Otonomiya Çandê ya Kurd a Soçî Osman Yilmaz axivî.

 Yilmaz da xuyakirin ku gelê Kurd di pêvajoyeke dîrokî de ye û got, "Girîng e gelê Kurd li her cihê lê ye, êdî xwe bi rêxistin bike û xwedî li nirxên xwe derkeve. Di 1'ê Mijdarê de tevî pîrozkirina serketina Kobanê, em ê serketina HDP'ê jî pîroz bikin. Ji bo dawîanîna li polîtîkayên qirêj ên Erdogan û AKP li Kurdistanê dimeşîne, em bang li tevahiya gelê xwe dikin ku di 1'ê Mijdarê de biçe ser sindoqan û vîna xwe nîşan bide."

Di civînê de her wiha rewşa li Rojavayê Kurdistanê, destwerdana Rûsyayê ya li Sûriyeyê û polîtîkayên AKP û Erdogan hatin nirxandin.

Civîn bi qîrîna dirûşmên ji bo cangoriyên têkoşîna azadiyê, bi dawî bû.