Navenda Ragihandinê ya YPG'ê bi daxuyaniyeke nivîskî ragihand, êrîşên komên çete yên ser bi 'Koalîsyona Sûriyeyê' yên li hemberî taxa Şêx Meqsûd a Helebê dewam dikin.

Di daxuyaniyê de hat gotin, "Komên çete, roja 26'ê Tîrmehê saet di 13:00 de, ji aliyê rêya Cendol ve hewl dan êrîşî taxa Şêx Meqsûdê bikin. Piştî destwerdana hêzên me li vê qadê şer derket û derb li maşîneke leşkerî ya çeteyan hat xistin. Hejmara kuştî û birîndarên çeteyan nehat zelalkirin.

Çeteyan heman rojê saet di 24:00 de, vê carê ji aliyê Şara 20'an ve êrîşeke berfireh pêk anîn. Çeteyan bi çekên giran êrîşî çeperên hêzên me kirin û şerê li vir heta ber destê sibehê dewam kir. Li pêşberî berxwedana hêzên me, çete neçar man xwe vekişînin."

YPG'ê diyar kir, di şerê li vê herêmê de gelek kuştî û birîndarên çeteyan çêbûn, lê hejmar nehat zelalkirin.

Di daxuyaniyê de hat gotin, "Hevalekî me yê di vî şerî de bi lehengî şer kir, gihîşt şehadetê, 3 hevalên me jî birîndar bûn."

Navenda Ragihandinê da xuyakirin, ku di şeva heman rojê saet di 22:00 de çeteyan ji çeperên xwe Yên li Ezazê bi çekên giran êrîş birin ser gundê Maranez ê li ser sînorê Efrîn û Ezazê ye.

Di daxuyaniyê de hat gotin, "Hêzên me jî bi xurtî li çeperên çeteyan xistin. Hejmara kuştî û birîndarên çeteyan nehat zelalkirin."