HDP, a ku têkildarî êrîşên derbeya siyasî yên di bin navê destlênedayînê de û di warê pêvajoyê de ji bo gel agahdar bike daket qadan, bi ziyaretên gel û dikandaran re ji gel re pêvajoyê radigihîne. Di vê çarçoveyê de Parlamenterê HDP’ê yê Rihayê Îbrahîm Ayhan li navçeya Xelfetiyê ya Rihayê bi gel re civiya û têkildarî rojevê gel agahdar kir, ziyareta dikandaran kir û bi gel re civîn li dar xist. Ayhan destpêkê beşdarî civîna li rêxistina HDP’ê ya li Xelfetiyê bû û anî ziman ku ku li dijî êrîşên AKP/Qesrê yên di bin navê destlênedayînê de dixwazin vîna wan bişkînin, heta dawiyê wê têkoşîna xwe dewam bikin. Ayhan wiha axivî: “Biryara rakirina destlênedayîna parlementeran û ji siyasetê dûrkirinê, rejîma AKP/Qesrê nikare bide. Biryara siyasetkirinê tenê gel dide.”

Ayhan da zanîn ku êrîşeke li dijî vîna gel a ku dixwazin bê vîn bihêlin heye û wiha pê de çû: “ Ji vir û şûn de bila ew bifikirin. Em ti carî gavê şûnde navêjin. Em ê bi gelê xwe re jiyaneke birûmet ava bikin û ji bo vê heta dawiyê têkoşîna xwe bimeşînin. Ti kes nikare me ji vê rêyê vegerîne. Her çiqasî derdora me dorpêç jî kiribin, me bi tenê jî bihêlin, em ê bi gelê xwe re hêzeke mezin in. Em her demê li gel gelê xwe bûn û ji niha û şûn de jî em ê li gel gelê xwe cih bigirin. Em hêza xwe ji gelê xe digirin. Heta ku gel li cem me be, em ti carî ji têkoşîna xwe gavê şûnde navêjin.”

Ayhan û heyeta pê re, piştî civîna gel li Taxa Bazûr tevlî ziyareta şînê bûn û piştre derbasî Taxa Gogana Jor bûn. Li vir serdana dikandaran kirin. Endamê Meclîsa HDP’ê Mehmet Karayilna, Hevşaredarê Xelfetiyê Mûstafa Bayram û partiyî bi Ayhan re tevlî serdanan bûn. Ayhan di ziyareta dikandaran de rastî eleqeyek mezin hat, li vir pirsgirêkên dikandaran guhdar kir. Piştî serdana dikandaran jî bername bi dawî bû.