Li kantona Efrînê sala xwendinê ya nû sibe bi tevlîbûna 41 hezar xwendekaran ku wê li ser meteryalên nû perwerde bibînin, destpê bike.

Piştî ku amadekariyên weke, sererastkirina dibistanan, amadekirina meteryal û mamosteyan bi dawî bûn, biryar hat dayîn ku sibe 28.9.2015’an sala xwendinê ya 2015/2016’an destpê bike.

Di vê çarçoveyê de jî wê 300 dibistanên Kantona Efrînê yên seretayî, navîn û amadeyî deriyê xwe ji xwendekaran re vekin.

Sibe wê nêzî 31 hezar xwendekarên dibistanên seretayî, bi cilên xwe yên sor û şînê tarî ku ji aliyê Desteya Perwerdeyê ya kantonê ve hatine erêkirin, berê xwe bidin dibistanan.

Biryar e ku di dibistanên seretayî de pêkhateyên Kurd û Ereb li ser meteryalên nû bên perwerdekirin. Xwendekarên Kurd wê di 6 refên dibistanên seretayî de, perwerdeyê bi zimanê Kurdî bibînin û zimanê Erebî wê ji refa 4’an de destpê bike û zimanê Îngîlîzî jî wê ji refa 5’an de destpê bike.

Xwendekarên ji pêkhateyên Ereb jî wê di dibistanên seretayî de bi zimanê Erebî perwerde bibînin û zimanê Kurdî wê ji refa 4’an de destpê bike û zimanê Îngîlîzî jî wê ji refa 5’an de destpê bike.

Îsal wê 10 hezar xwendekarên dibistanên navîn û amadeyî jî berê xwe bidin dibistanan.