Amadekariya ji bo meş û mîtînga mezin a wê di 8’ê Mijdarê de li bajarê Kolnê yê Elmanyayê bi dirûşmeya “Azadî ji Rêber Apo re, çareserî ji pirsgirêka Kurd re” bê lidarxistin, didomin.

Li Navenda Kurd a Demokratîk a Kolnê, di çarçoveya amadekariyên teknîkî û rêxistinî yên meşê de, bi beşdariya Hevserokên KCDK-E’yê Zubeyde Zumrut û Engîn Sever, endamên Meclisa Jinê YJK-E, aktîvîstên Tevgera Ciwanên Şoreşger û Jinên Ciwan ên Têkoşer, hunermendên TEV-DEM’ê û nûnerên saziyên cuda yên Kurd ên demokratîk civînek hate lidarxistin.

Di civînê de ji bo ku meş bi rêkûpêk, bi hêz û girseyî derbas bibe, plansaziya rê, rêkûpêkiya qadê, sîstemên sehne û deng, dabeşkirina ewlehiyê û bikaranîna materyalên dîtbarî hatin nirxandin.

AMADEKARÎ TÊNE TEMAMKIRIN

Piraniya materyalên ku wê di meş û mîtîngê de bên bikaranîn hatine amadekirin. Di nav van de pankart, dowîz, afîş, poster, broşûrên agahdarkirinê, flama, al û dirûşm hene. Amadekariyên materyalên ku wê li ser rê hişmendiyeke dîtbarî çêbikin jî gihîştin qonaxa dawiyê.

LI NRW’Ê XEBATÊN QADÊ BÊ NAVBER DIDOMIN

Li eyaleta Nordrhein-Westfalen (NRW) ji bo beşdariyeke berfireh di meşê de pêk were, xebatên agahdarkirin û seferberiyê didomin. Di rojên dawî de li navendên bajaran ên cuda stantên agahdarkirinê hatin vekirin, belavok avêtin qutiyên posteyê, serdanên sazî û komeleyan hatin kirin.

Hevdîtinên rêxistinên jin û ciwanan bi gel re, danasînên bi beşdariya hunermendan û civînên agahdarkirinê bi tempoyeke giran didomin. FED-MED û Navendên Civaka Kurd ên girêdayî wê, bi taybetî bi koordînasyona avahiyên ciwan û jinan xebatên xwe yên li qadê bê navber didomînin.

Di xebatên ku bi armanca xwedîderketina li perspektîfa “Civaka Demokratîk û Aştî” ya Rêber Apo û misogerkirina azadiya wî tên meşandin de, tê payîn ku parêzvanên mafên mirovan ên navneteweyî, siyasetmedarên Kurd, înîsiyatîfên aştiyê û rêxistinên civaka sivîl ên alîgirên azadiyê beşdar bibin.

Bi amadekariyên li seranserê NRW’ê didomin, tê armanckirin ku meş û mîtînga 8’ê Mijdarê bi beşdarî û biryardariyeke xurt pêk were.