Li bajarê Strasboûrg ê Fransayê, dostên gelê Kurd di çalakiya ku ji aliyê nûnertiya DEM Partiyê ya Konseya Ewropayê û Navenda Civaka Kurd a Demokratîk a Strasboûrgê ve hat organîzekirin de hatin cem hev.

Alîkarê Serokê Parlamentoya Ewropayê Filippos Alatopoulos, koordînatorên Koma Dostaniya Kurdan a Parlamentoya Ewropayê Andreas Schieder, Lydie Massard, Chris Macmanus, Françoise Alfonsi û ekîba wan, Sekretera Giştî ya Koma Çep a Konseya Ewropayê Anna Kolotova, parêzerên Rêberê Gelê Kurd Abdullah Ocalan û xebatkarên ofîsa endamê Parlamentoya Ewropayê Giulanio Pisapia û rojnamevan beşdarî çalakiyê bûn.

Di çalakiya li Navenda Civaka Demokratîk a Kurd de hate lidarxistin de nûnerê DEM Partiyê yê Konseya Ewropayê Fayik Yagizay axivî û destnîşan kir ku têkoşîna Kurdan têkoşîna hemû bindestên ku dixwazin azad û wekhev bijîn.

Yagîzay di axaftina xwe de bal kişand ser tecrîda li ser Rêberê Gelê Kurd Abdullah Ocalan jî û diyar kir ku tecrîd sûcê mirovahiyê ye û tecrîd li ser hemû gelên Tirkiyeyê tê meşandin. Yagîzay têkildarî qirkirina siyasî, rewşa dawî ya girtiyên siyasî û şerê li Kurdistanê bi taybet li Rojava diqewimin agahî da û diyar kir ku êrîşên dagirkeriyê yên dewleta Tirk li ser jiyana rojane ya gelê sivîl pêk tê û destnîşan kir ku dost û dostên Kurdan hemû hêzên alîgirê demokrasiyê xwedî wê hêzê ne ku bi hev re vî şerî rawestînin.

Li ser navê Navenda Civaka Kurd a Demokratîk a Strasboûrgê Helena Erîn axivî û têkildarî pêngava “Ji Abdullah Ocalan re azadî ki pirsgirêka Kurd re çareseriya siyasî” agahî da. Erîn diyar kir ku divê pêngava çareseriya pirsgirêka Kurd derbasî qada navneteweyî bibe û berfireh bibe.

Parlamenterên beşdarî çalakiyê bûn di axaftinên xwe de diyar kirin ku ew piştgiriyê didin têkoşîna gelê Kurd. Parlamenteran anîn ziman ku Îmralî mifteya çareseriya aştiyane ya pirsgirêka Kurd e û destnîşan kirin ku divê di zûtirîn demê tecrîd bi dawî bibe û azadiyq Rêberê Gelê Kurd Abdullah Ocalan pêk were.

Çalakî bi konsera muzîkê ya Hunermend Sîdar Amedî bi dawî bû.