Li paytexta Fransa Parîsê di 9’ê Çileya 2013’an de yek ji kadroyên pêşeng ên PKK’ê Sakîne Cansiz (Sara), Nûnera KNK’ê ya Parîsê Fîdan Dogan (Rojbîn) û endama Tevgera Ciwanên Kurd ên Ewropayê Leyla Şaylemez (Ronahî) hatin qetilkirin. Komkujiyan Parîsê li paytexta Yewnanistan Atînayê bi meşekê hate protestokirin.

Kurdistanî û dostên wan di 11’emîn salvegera komkujiyê de li ber Akademiya li navenda bajêr hatin cem hev. Di çalakiyê de alên PKK'ê, posterên Rêberê Gelê Kurd Abdullah Ocalan, Sara, Rojbîn û Ronahî û Emîne Kara (Evîn Goyî), Mîr Perwer û Abdûrrahman Kizil ên di Komkujiya duyemîn a Parîsê de hatin qetilkirin û dowîzên “Jin Jiyan Azadî" û "Jiyana min her tim di nava şer de bû" hatin hilgirtin.

Kurdistanî ji vir bi dirûşmeyên “Şehîd namirin”, “Sara, Rojbîn, Ronahî, Jin, Jiyan, Azadî” û “Bijî Serok Apo” ber bi Serbalyozxaneya Fransayê ya li Atînayê ve meşiyan. Piştî meşê bi dirûşm û tilîliyan li ber Serbalyozxaneyê daxuyanî hat dayîn. Siyasetmedarê Kurd Erkan Erencî piştî deqîqeya rêzgirtinê axivî û diyar kir ku 3 jinên Kurd bi talîmat û rêxistikirina Tirkiyeyê hatine qetilkirin. Erencî diyar kir ku komkujî li hemberî paradîgmaya "Jin, Jiyan, Azadî" ya Rêberê Gelê Kurd Abdullah Ocalan ve hatiye kirin û destnîşan kir ku tevî komkujiyan jî ev paradîgma li cîhanê belav bûye.

'AKP'Ê ÊRÎŞÊN XWE ANÎ EWROPAYÊ’

Aktîvîsta jin a Kurd Bahar Anahtar diyar kir ku şerê qirêj ê Tirkiyeyê yê li dijî Kurdan bi Komkujiya Parîsê re derbasî Ewropayê bûye û wiha got: “Ev operasyona bixwîn, pêkhateya kontra ya dewleta Tirk bi awayekî zelal derxist holê. Armanca sereke ya tifaqa faşîst a AKP-MHP’ê ew bû ku konsepta şerê taybet, êrîşa topyekûn û şerê qirêj bigihîne her cihê ku Kurd lê dijîn. Ewropa jî di nava siyaseta êrîşên dagirkeriyê, komkujî û qirkirina Başûr û Rojava de bû. Bi erêkirina hêzên navneteweyî re bi hedefgirtina konsepta têkbirina têkoşîna azadiya Kurd û pêşengên wê yên li Ewropayê,  çarçoveya wê berfirehtir bû."

Anahtar wiha got: “Mirovahî, dîrok û gelê Kurd wê vê komkujiya qirêj, teşwîqker, yên ku bêdeng man, yên temaşe kirin tu carî efû neke. Wê wijdanê mirovatî û edalet bi ser bikeve, têkoşîna azadiyê ya gelê Kurd wê dawî li van komkujiyan bîne. Dawiya dawî wê bi darizandina gumanbaran bi encam bibe.”