Konseya Kurd a Swîsreyê (CDK-S) û Tevgera Jinan a Swîsreyê (YJK-S) bi taybetî Kurdistanîiyan û her kesî vexwendin Parîsê. Hevseroka CDK-S'ê Selma Surer diyar kir ku li bajarên ku meclîs lê hene dê bi otobusan biçin Parîsê.

Di daxuyaniya hevpar a nivîskî ya CDK-S û YJK-S’ê de, kesên di komkujiyên Parîsê de şehîd bûne, hatin bibîranîn.

Di daxuyaniyê de wiha hat gotin: "Divê em nîşan bidin ku em ê hesab ji kujeran bipirsin. Ne tesaduf e ku dewleta Tirk pêşengên jinên Kurd ên şoreşger dike hedef. Ev komkujî hem li dijî Tevgera Azadiyê û hem di şexsê jinên Kurd de êrîşî şoreşa jinan dikin . Yên ku gulebaran dikin ne girîng e. Berpirsiyarê sereke yê van komkujiyan dewleta Tirk a dagirker e. Bi vê yekê Em bawer dikin ku gelê Kurd ê li Swîsreyê dijîn û dostên wan wê bi biryardariyeke mezin beşdarî meş û mîtînga bibin. Ji bo şermezarkirina êrîşên hovane li Parîsê pêk hat, wê otobus ji hemû meclîsên me yên girêdayî CDK-S'ê bên derxistin."

'DÊ JIN TARÎYA PARÎSÊ RONÎ BIKIN'

Hevseroka CDK-S’ê Selma Surer ku ji ajansa me re axivî diyar kir ku hedefgirtina pêşengên şoreşa jinên Kurd nîşaneya tirsa dewleta Tirk ji jinên Kurd e û wiha axivî: “Em jinên Kurd her tim û li her qadê li cem Rêber APO disekinin. Em ê paradîgmaya azadiyê biparêzin. Wê nikaribin tu carî ê şoreşê bi komkujiyan têk bibin. Li her qada ku em lê ne,hesabê komkujiyan bipirsin.  Hewl didin komkujiyên Parîsê veşêrin. Em ê bi israr bibêjin, 'Parîs di tariyê de ye, edalet li ku ye?' Weke jinên Kurd em ê bi têkoşîna xwe vê tarîtiyê ronî bikin. Em dixwazin ji 7 salî heta 70 salî her kes bi taybetî jin beşdarî meş û mîtînga 6’ê Çileyê ya li Parîsê bê lidarxistin bibin. Li bajarên ku meclîsên me lê ne, em ê gelê xwe bi otobusan veguhezînin Parîsê. "

Selma Surer da zanîn ku ew ê di 5'ê Çileyê de ji bajarên Cenevre, Lozan, Bîel, Bern, Zug, Luzern, Solothurn, Aarau, Basel, Zurîh, St.Gallen, Winterthur û Rapperswil ên Swîsreyê bi otobus û wesayitên taybet biçin Parîsê.