Di encama karê komek ji Kurdistaniyên li Swîsreyê de ku demeke dirêj e dikin, bi navê "Akademiya Kurd" saziyeke çandî û akademîk a nû hate ragihandin.

Di daxuyaniyê de hate ragihandin ku têkoşîna nîv sedsalê dawî ya gelê Kurd ne tenê siyasî, di heman demê de pêvajoya jinûve avakirina çandî û civakî ye. Hate destnîşankirin ku danheviya civakî, çandî û îdeolojîk a Tevgera Azadiyê ya Kurd pêşî li karên nû vekiriye.

Berdevkê Akademiya Kurd Îsmaîl Kardaş anî ziman ku proje piştî banga "Aştî û Civaka Demokratîk" a Rêber Apo ya 27'ê Sibatê hîn bi lez pêk hat.

Kardaş diyar kir ku bingeha akademiyê xwe dispêre karê du salan ê komîsyona perwerdeyê ya Konseya Kurd a Demokratîk a Swîsreyê (CDK-S). Kardaş anî ziman ku pêwîstiya perwerdeyê ya komîn û meclîsên li Swîsreyê di vê pêvajoyê de xwedî roleke girîng bû û hate destnîşankirin ku armanc ew e; bi akademiyê bersiv ji pêwîstiyê re bê dayin.

Hate ragihandin ku di pêvajoya avabûna akademiyê de li gorî qanûnên Swîsreyê rêziknameyeke guncaw hate amadekirin û mufredata wê hate afirandin. Hate gotin, mufredat wê li gorî pêwîstiyên demê bê nûkirin.

Kardaş destnîşan kir ku perwerdeya wan jî wê bi zaravayên cuda yên Kurdî bê dayin.