Li bajarê Marsîlya yê Fransayê, bi hezaran kes ji bo şermezarkirina qetilkirina 17 gerîlayên HPG’ê bi çekên kîmyewî ji aliyê dewleta Tirk ve, daketin qadan. Kurdên welatparêz neçûn dibistanan û ser kar. Pankartekê mezin ê wêneyên gerîlayên qetilkirî li ser, alên PKK’ê û wêneyên Rêberê Gelê Kurd Abdullah Ocalan di çalakiyê de hatin hildan.

Ji bo balê bikêşin li ser êrîşên kîmyewî de, çalakgeran, cilên spî li xwe kirin û darbesteke li ser “Komara Tirkiyeyê me bi çekên kîmyewî dikuje, hûn ê dengê xwe nekin“ nivîsandî hilgirt. 

Çalakgeran, li navenda bajêr bi pênc deqeyan çalakiya rûniştinê li dar xist, rê li çûn û hatina wesayîtan girt û darbest danî ber avahiya walîtiyê.

Berdevka TJK-E’yê Zozan Serhat ku li mîtîngê axivî, bang li gel kir ku ji bo gerîla bibe nefes û bang li welatên Ewropayê kir ku dev ji polîtîkaya dijminatiya Kurdan berdin û wiha got: “Çekên xwe yên kîmyewî ji Kurdistanê bibin! Destê xwe ji nav qirkirina ciwanên Kurd derbixin. Dayikên Kurd, divê dil, çav û guhên dayikên Kurd, jin, ciwan û gelê welatparêz li ser gerîla be!“

Çalakî, bi berzkirina dirûşmeyan bi dawî bû.