Li bajarê Marîgnane yê Fransayê salvegera 41’an a têkoşîna çekdarî ya ku Tevgera Azadiya Kurd di 15’ê Tebaxa 1984’an de dayî destpêkirin, ji aliyê gelê welatparêz ve bi ruhê yekîtiya neteweyî û piştevaniyê hate pîrozkirin. Gel li Komeleya Çandê ya Kurd a Marîgnane hate ba hev.

Şahî ji bo bîranîna Şehîdên Azadiya Kurdistanê bi deqeyek rêzgirtinê destpê kir.

Siyasetmedarê Kurd Kamil Akban di şahiyê de axivî û got, “15’ê Tebaxa 1984’an weke destpêka têkoşîna çekdarî ya PKK’ê, ji bo gelê Kurd xaleke werçerxê ya dîrokî ye. Ev dîrok weke destpêka têkoşîna Tevgera Azadiya Kurd a ku bandor li qada neteweyî û navneteweyî kiriye, tê qebûlkirin.”

Beşdaran li ber stranên Kurdî govend gerandin û bê navber dirûşmeyên “Bijî Serok Apo”, “Bijî 15’ê Tebaxê” û “Jin, Jiyan, Azadî” berz kirin. Şahî heya derengî şevê dewam kir.