Di çarçoveya kampanyaya ku bi armanca derxistina PKK’ê ji lîsteya "rêxistinên terorê" hatî despêkirin de, li Kopenhag a Danîmarkayê îmze hatin berhevkirin.

Di çalakiyê de êrîşên dagirkeriyê yên dewleta Tirk ên li ser Başûrê Kurdistanê û bikaranîna gaza jehrî ya li hemberî gerîla hate protestokirin.

Standa îmzeyan saet di 14:00’an de li meydana Nytrov a navenda bajêr hat danîn. Li standê ji bo derxistina PKK’ê ji lîsteya "rêxistinên terorê" îmze hatin komkirin û broşurên ku têkoşîna PKK'ê vedibêjin hatin belavkirin.

Di axaftinan de hate destnîşankirin ku gerîla hêza sereke ya xweparastinê ya Kurd û Kurdistanê ye ku li dijî her cure êrîşan li berxwe dide; her wiha hate gotin ku gelê Kurd wê ti carî li ber êrîşên dagirkeriyê yên dewleta Tirk çok nedeyne û zû yan dereng wê Tirkiye ji ber sûcên mirovahî ku bi pêkanîna qirkirina siyasî, çandî û fîzîkî dike bê darizandin.

Çalakvanan diyar kirin ku ew ê sibe li qadên 1'ê Gulanê bin û bang li her kesî kirin ku li dijî faşîzmê li cem gelê Kurd bin.