Li bajarê Frankfurt ê Elmanyayê ji aliyê înîsiyatîfa "Defend Kurdistan" ve şahiya hevgirtinê hat lidarxistin. Şahiyê bi armanca ku balê bikişîne ser pêvajoya aştiyê ya li Tirkiyeyê û pêşketinên li Rojava û herêmên Kurdan hat lidarxistin.

Di şahiya ku gelek beşdarbûn de peyamên li ser hevgirtina navneteweyî û têkoşîna hevpar hatin dayîn. Hevseroka Partiya Çep (Die Linke) a Elmanyayê Janine Wissler û nûnera medico internationalê Anita Starosta di şahiyê de axivîn.

Di konserê de ji bo piştgiriya projeyên cûrbecûr ên li herêma Kurdan bexş hatin berhevkirin. Dahata wê ji Heyva Sor a Kurdistanê (Heyva Sor a Kurd), medico international – Solardarity, û Initiative Frieden und Hoffnung eV were şandin.

Nûnerê "Defend Kurdistan" di axaftina xwe de li ser têkoşîna gelê Kurd bi dehan sal in li hember şer, dagirkerî û hewldanên ji bo tunekirina nasnameya tê dayîn rawestiya û got, "Tevgera Azadiya Kurd bi modela civakê ya li ser bingeha demokrasî, azadiya jinan û ekolojiyê hêviyê dide her kesî. Ji ber vê yekê êrîş li ser tê kirin. Lê çand berxwedan e; nayê qedexekirin."

Endama Koordînasyona Kongra Star Mûna Yûsif jî anî ziman ku ezmûna rêveberiya xweseriya demokratîk a Bakur û Rojhilatê Sûriyeyê li ser bingeha azadiya jinan, jiyana ekolojîk û demokrasiya pirçandî ye. Mûna Yûsif bal kişand ser girîngiya hevgirtina navneteweyî û got, "Gelê Rojava li dijî êrîşan têkoşîna xwe ya ji bo azadiyê didomîne. Divê her kesê ku demokrasî û mafên mirovan diparêze piştgiriyê bide vê têkoşînê."

Şahî bi pêşandanên folklor û govendê berdewam kir û bi berzkirina dirûşmeya "Bijî berxwedana Rojava" bi dawî bû.