Li bajarê Frankfûrt ê Elmanyayê bi boneya salvegera serhildana “Jin, Jiyan, Azadî” a bi qetilkirina Jîna Emînî re di 16’ê Îlona 2022’an de li Rojhilatê Kurdistanê û Îranê dest pê kir, Konferansa Jin Jiyan Azadî hate lidarxistin. Di konferansê de pêşeroja berxwedanê hate nîqaşkirin.

Di rûniştina yekem a konferansê de Nûnera Meclîsa Jinan a Bakûr û Rojhilatê Sûriyê (Rojava) Emîne Omer, senatora berê ya Afxanistanê Belqis Roshan, endama Meclîsa Federal a Elmanyayê û Partiya Die Linke Janine Wissler, nûnera Civata Jinên Azad ên Rojhilatê Kurdistanê Maryam Fathi û wergêr û rojnamevan Pedram Zarei beşdar bûn.

Di beşa duyemîn a bi navê "Asoyên Têkoşînê, Piştgirî, Mişextî û Şoreşa Pêşerojê" de, endama Kolektîfa Femînîst a ROJA Hiresh Kheirabadi, çalakvana jîngehê Yahya Serkhani, pispora jîngehê û vekolîner Azam Bahrami, doçenta alîkar a Enstîtuya Lêkolînên Rojhilatî ya Zankoya Jagiellonian (Polonya) Azad Hacı-Aghaie û wergêr û filozofYeganeh Khoei wekî axiver cih girtin.